Միացեալ Նահանգներու մէջ կազմակերպուած վերջին հարցախոյզերը ցոյց կու տան, թէ նախագահ Պարաք Օպամա աւելի մեծ առաւելութիւն կը վայելէ քան հանրապետական թեկնածու Միթ Ռոմնին:

Սէուտական Արաբիոյ Արամքօ նաւթային ընկերութիւնը նաւթամշակման ծրագիր մը կը պատրաստուի գործադրութեան դնել Կարմիր Ծովուն մէջ: Սոյն ծրագիրին իրագործման համար Արամքօ պիտի ներդնէ 25 միլիառ տոլարի գումար մը: Նախնական տուեալներու համաձայն, Կարմիր Ծովուն մէջ գտնուող նաւթի պաշարները կը գնահատուին 100 միլիառ տակառ:

«ՊԻ.ՊԻ.ՍԻ»ի կողմէ աւանդական դարձած այս հարցախոյզին արդիւնքը չի տարբերիր իր նախորդներէն: Արդարեւ, աշխարհի տարբեր ափերու վրայ կազմակերպուած հարցախոյզը կը հետեւցնէ, որ համաշխարհային հանրային կարծիքը բացասական տրամադրուած է Իսրայէլի նկատմամբ:

«Ռասիա -24» հեռատեսիլի կայանին տուած հարցազրոյցին մէջ, նախագահ Պաշար Ասատ դիտել կու տայ, թէ խորհրդարանական ընտրութիւնները ապացուցեցին, թէ երկրի բնակչութիւնը կը պաշտպանէ իշխող վարչակարգը: « Ընտրութիւնները շատ կարեւոր քայլ են, անոնք խոստացուած բարեկարգութիւններու մէկ մասը կը կազմեն: Սուրիացի ժողովուրդը չվախցաւ ահաբեկիչներու ապառնալիքներէն: Մենք պիտի շարունակենք բարեփոխութիւնները» շեշտեց Սուրիոյ նախագահը: Ասատ նաեւ ըսաւ, թէ Սուրիոյ հողերուն վրայ կան ահաբեկիչներ, որոնց դէմ ստիպուած է շարունակելու պայքարը:

Յունաստանի ձախ արմատական՝ ՍԻՌԻԶԱ խմբաւորոմի պետ Ալեքսի Ձիպարս յայտարարեց, թէ Գերմանիոյ վարչապետ Անկելա Մերքէլ «Փոքեր» կը խաղայ Յունաստանի հետ: Ան ըսաւ, թէ տնտեսական խնայողութեան դիմելու Մերքէլի քաղաքականութիւնը Յունաստանէն պիտի տարածուի համայն Եւրոպայի մէջ: Քաղաքական մեկնաբաններու կարծիքով, Ձիպարս առաւելագոյն ձայները պիտի ապահովէ Յունաստանի յառաջիկայ ընտրութիւններուն: